Matta tiwargiwin ad ?

Taddângiwin ar yyi ssudumnt iwrzan
gh tmaggugt arn ttannaygh azmul-an ismrqqin
iznzarn n tafukt gh utwwan

Matta tiwargiwin ad ?

Usin yyi kra ijjujutn fulkinin s ignwan
ijujjutn lli d nkregh gn yyi marur
fln yyi-d ikwttayn n isgwasn zrinin
syafagh s ixf inu ngaran ditngh
ini izd amzruy ad yurri-n ad smdn tirra gh ul inw ?

Matta tiwargiwin ad ?

Duygh-d afgh-d ixf inu ghid a ur ssinagh
izêri glin yyi s tmdlut an ijlan gh ignwan
gh tuzzûmt-ns had yat tiddi ar di ttâz
tlkm yyi-d, sigh angh ibid uzmz

Matta tiwargiwin ad ?

Argaz ad d ittitin ar-d ittaz ar darngh
ur igi abla Jddi, zik tukr aght lmut
Tsbrkt yyi gh izri-nk, izîln, issimyurn
mqqar lâh awal ayhayya nw

Matta tiwarigiwin ad ?

Gh ifssi-nk sllagh i wawal iddrn
ur tmmuddit, ur tzugt, is yyi tmatrt
ghrigh gh izri nk, ma ur ittaran gh idllisn
Tamdlut tnfassi, zrgh tawmrt gh utwwan